سياسة الخصوصية

آخر تحديث: ٢ نوفمبر ٢٠٢٦

دَرْس بيتعامل مع بياناتك حسب قانون حماية البيانات الشخصية المصري رقم ١٥١ لسنة ٢٠٢٠. الصفحة دي بتقول بنجمع إيه، وليه، ومين بيشوفه، وإزاي تمسحه.

بنجمع إيه

بيانات الحساب (الاسم، الإيميل أو رقم الموبايل، الصف والمواد)، اللي بتعمله وانت بتذاكر (الدروس اللي فتحتها، إجاباتك، الحصص الصوتية وتسجيلاتها)، الملفات اللي بترفعها، وبيانات الدفع (المبلغ والتاريخ — بيانات الكارت بتروح لمزوّد الدفع مباشرة ومش بتعدّي علينا).

الطلبة تحت ١٨ سنة

أغلب طلبتنا تحت ١٨ سنة. أول ما الطالب يجهّز حسابه بنطلب منه يأكّد إن ولي أمره عارف وموافق، وبنحفظ وقت الموافقة دي. ولي الأمر يقدر يربط حسابه ويشوف ملخصات وتقدّم ابنه (مش نص كلامه في الحصص)، ويقدر يطلب مسح حساب ابنه في أي وقت من صفحة التواصل. مش بنستخدم بيانات الطلبة في إعلانات موجّهة ليهم.

حقوقك

من حقك تعرف إحنا عارفين عنك إيه وتاخد نسخة منه، تصحّح أي حاجة غلط، تسحب موافقتك، وتمسح بياناتك. أغلب ده تقدر تعمله بنفسك: بياناتك في «حسابي» و«الإعدادات»، والمسح الكامل من «الإعدادات» ← «امسح حسابي». أي طلب تاني ابعته من صفحة التواصل وبنرد خلال ٣٠ يوم. ولو شايف إننا ماحترمناش حقك، من حقك تشتكي لمركز حماية البيانات الشخصية.

مسح الحساب

«امسح حسابي» في الإعدادات بيمسح على طول: الحساب، التقدّم والإجابات، الحصص وتسجيلاتها، الملفات اللي رفعتها، وذاكرة المدرّس عنك. سجلات المدفوعات بتفضل من غير اسمك عشان الحسابات والضرايب.

مين بيعالج بياناتك معانا

بنستخدم مزوّدين بيشتغلوا لحسابنا بس: استضافة قاعدة البيانات والملفات (Supabase وRailway)، الذكاء الاصطناعي للشرح والصوت (Google Gemini)، تحويل الكلام لنص (Soniox)، الصوت المباشر (LiveKit)، ذاكرة المدرّس (Supermemory)، رسايل واتساب (Bird)، الدفع (Kashier)، وإشعارات الموبايل (خدمة الإشعارات بتاعة Apple أو Google حسب جهازك). خوادم بعضهم بره مصر. مش بنبيع بياناتك لأي حد.

التفاصيل

احنا في دَرْس بنحترم خصوصية كل طالب وولي أمر ومدرّس. البيانات اللي بنجمعها بتُستخدم لتحسين تجربة التعلم بس، ومش بنبيعها لأي طرف ثالث.

الدخول بيبقى برقم الموبايل: بنبعتلك كود على واتساب عن طريق مزوّد رسائل، فرقمك والكود بيوصلوه هو كمان — ده الطريق الوحيد عشان الرسالة توصلك. الكود نفسه بيتخزّن عندنا **مهشوش** وبيخلص بعد ٥ دقايق، ورقمك بيتخزّن عشان تدخل بيه وعشان الدعم يقدر يكلّمك في حاجة تخص حسابك. مش بنبعتلك إعلانات على واتساب من غير ما توافق، ومش بنبيع رقمك ولا بنديه لحد تاني. تقدر تغيّر رقمك أو تطلب مسحه من صفحة التواصل.

المدرّس بيرفع محتواه (محاضرات، ملازم، أسئلة) عشان الشرح يتبني منه. مش بنستخدمه لأي غرض تاني من غير موافقته الصريحة. مفيش استنساخ أصوات في المنصة — الشرح بصوت اصطناعي جاهز.

محادثات الطلبة الصوتية بتتنقل على اتصال مُشفّر (TLS) وبتتعالج عند مزوّد الذكاء الاصطناعي اللي بنستخدمه. الحصص الصوتية بتتسجّل: صوت الطالب وصوت المدرّس، ونص الكلام، واللي اتكتب على السبورة — والطالب بيتقاله قبل ما يبدأ الحصة، وبيشوف علامة «بتتسجّل» طول الحصة. التسجيل بيتحفظ عندنا في مساحة مقفولة، ومحدش بيشوفه غير فريق دَرْس، عشان نراجع جودة الشرح ونحل أي مشكلة قابلت الطالب — مش بيظهر لولي الأمر ولا للمدرّسين، ومش بنبيعه ولا بنستخدمه في إعلانات. التسجيلات بتتمسح لوحدها بعد ٩٠ يوم، وتقدر تطلب مسح تسجيلاتك قبل كده من صفحة التواصل. ولي الأمر بيشوف الملخصات ونقط التركيز، مش نص كلام ابنه.

المدرّس بيفتكر الطالب من حصة للتانية: بنسجّل وقايع مذاكرة بس — أسماء الدروس اللي اتشرحت، اللي الطالب اتعثّر فيه، ونتايج التقييمات — عشان الحصة الجاية تبدأ من مكانه مش من الصفر. الوقايع دي بتتخزن عند مزوّد ذاكرة متخصص، كل متعلّم في مساحة مقفولة عليه لوحده، ومن غير اسمه ولا إيميله ولا تليفونه. مفيش نص محادثة بيروح لمزوّد الذاكرة، ولو رقم أو إيميل اتقال بالغلط بيتشال قبل التخزين. تقدر تطلب مسح الذاكرة دي في أي وقت من صفحة التواصل.

الاتصال الصوتي بيمر على خوادم مزوّد الصوت المباشر اللي بنستخدمه، وممكن تكون في منطقة جغرافية بره مصر — بنختار أقرب منطقة متاحة. الصوت بيتعالج عنده لحظيًا، والنسخة الوحيدة اللي بتتحفظ هي تسجيل الحصة اللي فوق، في مساحة التخزين بتاعتنا.

بنستخدم أدوات قياس من Meta (فيسبوك وإنستجرام) وTikTok عشان نعرف أنهي إعلان بيوصّل الناس للموقع. الأدوات دي بتستخدم ملفات تعريف (cookies) وبيانات زي نوع الجهاز. مش بنبعت أرقام موبايلات أو إيميلات الطلبة لأي جهة إعلانية.

وبنسجّل الصفحات اللي بتفتحها جوّه المنصة (زي الدروس والامتحانات) والوقت اللي بتقضيه فيها، وإجاباتك على الأسئلة والامتحانات — عشان نفهم الطلبة بيذاكروا إزاي، ونحسّن المحتوى، ونساعد لو حد واقف في حتة. البيانات دي بيشوفها فريق دَرْس بس.

أي سؤال عن بياناتك: كلّمنا من صفحة التواصل.